ديفيد منيب يكتب ……………………………………”لحن …………..بدون …………….نوتة”……………؟؟

قصيدة “لحن بدون نوتة” كفاية عزف يا عم الموسيقار مش هزار .. شايفك ناجح و طموح و عندك اصرار انما ماشى على وتر الكمان الحزين فا اعتبرتك سجين و مانعك تكمل المشوار لا انا محبط ولا محبط لا انا بتفزلك ولا بتتنك ولا حتى بنقد بس احنا لحن بدون نوتة الحانك قديمة مملة معدودة زمانك دلوقتى بتقول ” جيل مفتري بيهاجم الفن الأصيل و مظهري “ يا عم الموسيقار اوضحلك سوء التفاهم انا بس مليت من فن مبيعبرش عن جوهري ! بالمناسبة صحيح .. مش دة برضه السبب الأساسى عشان تعرف بس انى من جيل صريح للتوضيح .. الحانك بتفكرنى ب اهلى و ناسى و كلام ابويا و امى مجرد التشابه بينكوا زود همى ! ساعتها قالوا ” وجود الواد دة ف حد ذاته ورطة “ يكونش جه غلطة ؟! كل يوم يصبح ع السجاير ريقه دة لو نام ومرجعش وش الفجر جيل مش عارف طريقه .. جيل فقر تافه و طايش و فاشل .. حاله مايل قولتلهم قبل اي كلام دة اكتر جيل شاف شر ف عز افراحه و اعياده شاف الدم سايل !! وياريته اتحايل .. عيدنا على بعض وقولنا كل سنة واحنا متفجرين حزننا يومين .. ورجعنا نستنى Happy message و خروجات قولي كلمة حلوة تعيش معايا سنين “ اكتب كومنت و هسألك سؤالين “ تتشقلب مذيعين مذيعات و اهل الشهداء ف جنازات وبرضه اكونت صراحة شاغل كل البوستات ! تقصد اهل شهداء الحادث اللى فات ؟! لا ما دى كانت ارادة ربنا المرة دى جيل منطقش ولا هينطق قد كلمة ” عادى “ متلغبط احساسه و كأن الحزن نكتة يارب اتلونت مشاعره بالوان باهتة بالرغم انه جيل الثورة .. لكن الواقع خلاه معاند يتغير .. متحير .. سلبى بالفطرة حتى فولان قالى ” البنت دى عاملة فيها ملكة جمال “ طايرة بنفسها و بقصتها ودى خفيفة و مدلوقة سكتها شمال باين اصلا من مشيتها انا عمري ما حسيت بتقلها و هيبتها مدية رقمها لكل شلتها ودى مأفورة جدا ف ضحكتها وياريتنى بحسها بعدين مش شايف شكل لبسها ! هو النم ف طبع كل انسان واكيد ف مرة حتى صاب ناس عندها ايمان بس ايه المانع لو نتأنى ؟! و ننضف قلبنا و عينينا و وداننا الاول ساعتها نظرتنا للبنت هتتحول .. و ياعم الحكيم متعاتبهاش بنات جيلنا بيزهقوا من النصيحة انت بس شاورلها ع السكة الصحيحة .. وفرحها اجبارك للى انت عايزه بالعكس هيجرحها هيخليها ف الاخر تبيعك ببلاش ! اصلك محتويتهاش ! اعذرها .. دى ف هدوء الليل بتجري تقفل عليها اوضتها بتضعف من غير اسباب اعذرها .. هي مهتمة بكونها كائن جذاب جايز تكون اغلي منك انوثتها تخيل انها احيانا بتفرق بين خوفك عليها و على سمعتها ؟! اصلك محتويتهاش ! يا خسارة كل اب قدام بنته يوميا وشايفاه حد كانه مجاش يا خسارة كل اب مفهمش بنته وسط مجتمع قاصد ميفهمهاش مركز معاها وحالف ميسيبهاش بنقتلها ف اليوم 100 مرة واحنا ولا حاسينها طول ما بنبصلها من برة هنفضل ظالمينها ! البنت لما بتدور على الحنية بتبقى كطير شاف اعشاشه وبرضه لف اعشاش الدنيا الولد كميت ف فراشه بيتخلص من مقارنته باشخاص تانيه مش كل اب و ام عاشوا حبوا اولادهم .. بلاش مثالية الولد يقدر يحكي موضوع ف ثانية انما البنت بتموت ف الحكاوي و التفاصيل جواها عمق قرب يوصل للعقده فا عشان تفهمها محتاج صبر و وقت طويل احنا مش احسن منكو بل غيركوا يا اصحاب الفكر العقيم يا عاشقين السين و الجيم هل جه ف بالكوا ليه عاشرنا الموبايل عنكوا ؟! علفكرة فهمنا مش استحالة ولكنه شئ صعب كتير صعب تفهموا جيل الايموشن و الشير احنا كل ساعة بحالة .. بنعمل كوبى بيست لاحاسيس غيرنا ف عام من الاعوام اتبنى مصيرنا على مقدار الغش من شاومنج اكتر شئ بيخلى الجيل ده يتحجج هو التدقيق على تصرفاته و افعاله يا عم العجوز لما تحب تعرف ماله متقولوش بعدها “معلش” الناس دي عايزة اللي يقف جنبها زمن ال معلش انتهي وياعم الممعلش معلشك متمعلشهوش ومتنفعهوش .. ف ايدك عمل اعملهوله عندك حل قولهوله معندكش متكلمهوش ولو سيادتك خبرة وعاوز تبين ضيك اطمن .. ده يعلم مليون واحد زيك !! بس هي البلد مقدرتهوش آدي كل الحدوتة مش بقولك لحن بدون نوتة ولكن كفيل يتعزف بالحب والخير والوش البشوش !