اشرف عبد الله يكتب: عزيزتى وزارة التربية و التعليم : لماذا ؟

اقترب العام الدراسي من بدايته و كعادتنا كل عام نبحث عن جديد المناهج . بدأنا منذ ست سنوات بمنهج الصف الأول الابتدائي و ها نحن ذا وصلنا للصف السادس . نفس المعاناة كل عام و لا جديد . الكل يتحدث هنا و هناك.

وقف عمرو ( طالب الصف السادس ) مشدوها أمام كل ما يحدث من لغط الكلام و زخم الحديث

• منهج اللغة العربية صعب و طويل . النعت السببى يستنكر ما يحدث و البدل قدم احتجاجا رسميا لمسئول النحو الصرف فى الوزارة .

• العلوم به مصطلحات إنجليزية منها ما هو من الثانوية و منها ما هو مقتبس من كليات الطب و الصيدلة ومادة الفارماكولوجى .

• منهج الدراسات حاول الابتعاد عن أسرة محمد على و مشاكلها و لكن الأسرة رفضت و هددت بفرض الحماية البريطانية على مصر ، و إقرار الأحكام العرفية .

• منهج الرياضيات ستون درسا و لكن آخرون أكدوا أنها ثلاثون درسا فقط . الأعداد النسبية حائرة بين وجودها في الصف الأول الإعدادي و السادس الابتدائي في آن واحد ( طالعة بدورين ) .

أحاديث كثيرة هنا و هناك و لا أحد يعرف الحقيقة .
قرر عمرو أن يسأل و يستقصى حتى يعرف .
ذهب لوالده (( موجه الرياضيات )) و سأله ..
• ( ايه أخبار منهج الرياضة السنة دي ؟)
• ابتسم أبوه و رد بعد طول تفكير حاول من خلاله أن يجد ألفاظا تتناسب مع ما في داخله من غضب ( و الله يا ولدى ما اعرف لسة . لحد دلوقتى مفيش حاجة رسمى .)

• طيب و اللى بينزل على النت ؟
• دى حاجات مسربة و مش مضمونة و كل سنة بتنزل حاجات و حاجات فيها اللى بيطلع صح و فيها اللى بيطلع غلط .
• طيب و بعدين ؟!!
• اصبر يا ولدى و استمتع بإجازتك و المنهج هنعرفه هنعرفه متقلقش .

• طيب إزاى انت موجه و لحد دلوقتى متعرفش ؟
• الوزارة لحد دلوقتى مأعلنتش عن المنهج رسميا ممكن يكونوا لسة بيعدلوا فيه .
• طيب أومال إزاى كل سنة الكتب الخارجية بتعرف و توضع شرح و أسئلة و اختبارات و امتحانات و طبع و تغليف و توزيع ؟! معنى كدة إنهم عارفين من فترة طويلة .

• ده شغلهم يا ابنى و فيه اللي جوة الوزارة بيسربلهم أو يمكن شريكهم ؟! احنا مالنا ؟!!
• طيب و انتوا ليه محدش بيسربلكم ؟
• تقريبا ملناش لزمة لا إحنا و لا المدرسين مش مهم نعرف بدرى مش مهم نجهز شغلنا مش مهم نقسم الدروس و نحضر الأدوات اللازمة .

• طيب و الكتب ؟
• لأ دي بقة تستناها آخر شهر 11 .
• هو كل سنة حكاية الكتب دى هما مش من ست سنين بيطوروا و إلا عرفوا فجأة ؟
• يا ابنى صدعتنى كفاية بقة .
• تقريبا هما مش عاوزينكم تدوا دروس عشان كدة مخبيين عنكم المنهج .

• يعنى هو ده منع الدروس ما المدرسين بيجيبوا بعض التسريبات و بيشتغلوا منها و خلاص ، جنب مجموعة دروس للتأسيس .
• ليه ده كله ؟!! ده منهج تعليمي مش سر حربى يعنى ؟
• بطل رغى .
• الخلاصة مفيش حاجة لسة ؟
• لأ مفيش .
• أروح ألعب أحسن ………………

…. نحن لسنا ضد التطوير و لسنا ضد النظام التعليمي الجديد و نعلم مدى أهميته و دوره في تطوير المنظومة التعليمية في مصر و المجتمع كله بما يتضمنه من مهارات حياتية و أفكار تواكب العصر الحالي و تطور العالم من حولنا .
• و لكن لماذا نفس الأخطاء كل عام ؟
• لما التأخير ؟
• لماذا لا نبدأ من الآن في وضع منهج الصف الأول الإعدادي العام القادم و يكون متاحا للجميع بمجرد الانتهاء من العام الحالي؟
• و لماذا لا يتم طباعة الكتب قبلها بوقت كاف ؟
• لماذا ؟