من هى … سميحة سميح.. وحيدة أبوها وأمها واللى كانت أوامرها مجابة..

سميحة درست فى مدارس أجنبية.. واتعلمت لغات ومع اللغات اتعلمت العزف على الكمان ورقص البالية.. ومن كتر ما أجادت رقص البالية كانت بتتمنى أنها تحترف وتبقى راقصة بالية قديرة.. لحد ما بدأت تتردد مع ابوها على السينما.. وقتها حبت السينما واتمنت اليوم يجى وتقف فيه على الشاشة قدام الجانات الكبار..

وفى يوم من الايام يا سادة يا كرام.. راحت سميحة مع ابوها سميح تشوف فيلم يحيا الحب .. لمحمد عبدالوهاب والوجه الجديد وقتها ليلى مراد.. يومها محمد كريم مخرج الفيلم شافها.. ولفتت نظره ولما سألها بتحبى السيما؟ قالت ايوه يا استاذ ونفسي اشتغل فيها.. فكريم قرر أنه يديها فرصة فى فيلمه الجديد مع محمد عبدالوهاب..

روحت سميحة من السينما وهى فرحانة لكن بعد شوية ولما لقت أنه محدش بعت لها علشان الفيلم.. قالت يبقى كلامه معايا كان فض مجالس.. لحد ما جه يوم وكريم شد لها تلغراف بيقول فيه احضرى فورا يا سميحة..

حضرت سميحة إلى القاهرة فورا.. وبدأت البروفات.. على الالقاء والوقوف قدام الكاميرا.. فى نفس الوقت اللى بدأت فيها الاعلانات اللى بتكشف عن وجهين جداد هيقفوا قدام الاستاذ عبدالوهاب فى فيلمه الجديد يحيا الحب.. الاولى هى سميحة سميح والتانية هى الطفلة فاتن حمامة. .

نجحت سميحة فى الفيلم وتصورت أن شركات الانتاج هتجرى وراها لكن اللى حصل ان محدش قالها انتى فين غير بعد كام شهر .. لما طلبها ابراهيم لاما لفيلم صرخة فى الليل .. وبعده بسنتين عملت فيلم العريس الخامس.. وخلال تصوير الفيلم دخلت سميحة فى قصة حب مع مساعد المصور.. وبدأت تقول لكل اللى حواليها أنها هتشهر اسلامها وتتجوزه.. ولما رجعت المنصورة علشان تجهز للفرح.. اتقتلت.. واتقال فى قت*لها روايتين.. الاولى ان اليه*ود عرفوا انها هتغير ديانتها فقتلوها .. والرواية التانية بتقول ان جارها اللى كان بيحبها لما عرف انها هتتجوز قرر أنه ينتقم منها فقتلها ..