سميها زي ما تسميها.. أي جريمة بنت خطأ.. = أي جريمة ممكن تتنسي.. إلا قتل الروح..

= أي جريمة ممكن تتنسي.. إلا قتل الروح..

_ مش انتي بس اللي آسيتي، أنا آسيت أكتر منك.. أيوة يا ناهد، مفيش ألم في الدنيا أصعب من الإحساس بالندم، إحساس مر، كئيب، بيسقط جوة الانسان زي مايكون حجر تقيل بيخنق أي فرحة أو أمل. كل أحلامي القديمة بقت أشباع سودا قدامي ملازماني ليل مع نهار بفتكر لحظاتنا الحلوة بتعذب، بصرخ في نفسي وأقول أنا اللي ضيعتها.. بفتكر رقتك وحنانك وبراءتك بحس إن في صدري شيء بيلهب أنفاسي ويحولها لصهد، نار تسلع ما تحرقش.. اتمنيت في يوم أنساكي، اتمنيت في يوم أصحى ألاقيكي اتجوزتي وحققتي كل أحلامك، لكن حتى الأمل ده اعتبرته أنانية منّي زي ما اكون عايز أخلّص ضميري وارمي حملك.. وأنا مش قادر..

= مش هصدقك.

– أنا عمري ما كدبت في مشاعري

= كداب

-مكنتيش هدفي كل اللي عملته وكل اللي قلته وبتسميه كدب وخداع كان بعيد عن حبي ليكي.

= ايييه!! منطق جديد، اعمل كل اللي انا عايزه باسم الحب، اكدب باسم الحب، أضرب باسم الحب، اقتل باسم الحب..

– أنا قدامك أهو، ماعادش فيه انتقام، ماعادش فيه ثروة، ماعادش فيه تار بايت ولا حق ضايع، إيه اللي هيخليني اكدب عليكي..

= وانا إيه اللي هيخليني اصدقك..

-لحظة.. لحظة تفكري فيها لآخر مرة تراجعي أنا عملت كل ده ليه، تراجعي كل تاريخك معايا، لو لقيتي نقطة واحدة بيضا في وسط السواد ده كله يبقى أمل جديد يستحق اننا نحاول عشانه

= أنا دورت فعلا ملقتش غير السواد..

– تبقي ظالمة..

= أحسن ما أتظلم تاني..

-ناهد، الظروف اللي ظلمتنا خلاص راحت.. أوعدك. أوعدك إنها مش هتتكرر تاني..